It-traduzzjoni ta' Matilda ta' Roald Dahl

Abstract

It-teżi tiegħi tittratta t-traduzzjoni mill-Ingliż tal-ktieb Matilda ta' Roald Dahl għall-Malti. L-iskop ta' din it-teżi hu li nittraduċi ktieb popolari mal-ġenerazzjoni żgħira għall-Malti sabiex tkompli tikber u tiżviluppa l-letteratura Maltija. Permezz ta' dan ix-xogħol, jien nittratta qasam li qatt ma ħdimt fuqu qabel bħala traduttriċi. Naturalment, dan ilaqqagħni ma' sitwazzjonijiet li ma tantx imdorrijin bihom fil-Malti anki tal-istess ġeneru u joffri sfida biex kliem kollokkjali li hu differenti minn tagħna nsib l-ekwivalenza xierqa għalih. Għażilt li nittraduċi dan il-ktieb partikolari għaliex Dahl minn dejjem kien wieħed mill-awturi favuriti tiegħi bħala tifla, u ninsab familjari mal-maġġoranza tal-pubblikazzjonijiet tiegħu. Dan l-awtur għandu mod uniku kif jinżel għal-livell tat-tfal u jqiegħed ruħu fiż-żarbun tagħhom u jaħseb bl-istess mod immaġinattiv u kreattiv kif jagħmlu huma. Tħajjart għal Matilda fost xogħlijietu għaliex naħseb li l-intelliġenza straordinarja li toħroġ fid-diskors ironiku u umoristiku tagħha għandu jagħti pjaċir lill-udjenza lokali daqskemm kien ta' pjaċir għalija li nittraduċih. Barra minn hekk, iktar 'il quddiem għandi wkoll f'moħħi li nippubblika din it-traduzzjoni sabiex tkun disponibbli għal dawk kollha li jħobbu l-qari bil-Malti.