Id-dutturi nisa

Abstract

Fl-Eżortazzjoni Appostolika tiegħu, Gaudete et Exsultate [“Ifirħu u Thennew”], il-Papa Franġisku jikteb dwar is-sejħa għall-qdusija fid-dinja tal-lum. F’silta minn din l-Eżortazzjoni, il-Papa jgħid hekk: "Fost il-bosta xorta, nixtieq nisħaq li anki l-“ġenju femminili” jidher fi stili femminili ta’ qdusija, indispensabbli biex il-qdusija ta’ Alla tiġi riflessa f’din id-dinja. U proprju anki fi żminijiet meta n-nisa fil-parti l-kbira tagħhom kienu jitħallew barra, l-Ispirtu s-Santu qajjem qaddisin nisa li l-faxxinu tagħhom qanqal dinamiżmi spiritwali ġodda u riformi importanti fil-Knisja. Nistgħu nsemmu lil Santa Ildegarda ta’ Bingen, Santa Briġida, Santa Katerina ta’ Siena, Santa Tereża ta’ Avila jew Santa Tereża ta’ Lisieux.” Il-Papa jkompli billi jfakkar ukoll lill-qarrejja f’tant “nisa mhux magħrufa jew minsija li, kull waħda bil-mod tagħha, wieżnu u bidlu familji u komunitajiet sħaħ bil-qawwa tax-xhieda tagħhom.” M’għandix dubju li kull mara tħossha titqanqal għal dan ir-rikonoxximent ġej mill-ogħla awtorità fil-Knisja.