Il-familji ta’ Ghar il-Kbir fis-Siggiewi

Abstract

Bejn Ħad-Dingli u s-Siġġiewi jeżisti għar kbir li għal numru ta’ snin kien abitat min-nies. Dan l-għar hu magħruf magħna l-Maltin bħala Għar il-Kbir. Iżda dan ma kienx l-uniku għar abitat f’Malta fil-passat. Hekk pereżempju, fil-post illum magħruf bħala Raħal Ġdid, kien magħruf bħala Ta’ Għerien, b’referenza għan-numru ta’ għerien li kien hemm f’din l-akkwata. F’dawn l-għerien kienu jgħixu n-nies. Lejn il-Mellieħa wkoll kellek għerien abitabbli. Xi wħud minnhom baqgħu jgħixu n-nies fihom sa ftit taż-żmien ilu. Il-Patri Agostinjan Aurelio Haxac kien kiteb memorandum, illum mitluf, fit-tieni nofs tas-seklu sittax fejn spjega kif f’dawn l-għerien, ħafna snin qabel, kienu jgħixu fihom il-patrijiet Agostinjani. Wisq probabbli, id-devozzjoni lejn il-Madonna tal-Mellieħa tibda inkonnessjoni mal-preżenza ta’ rħib f’dawn l-għerien Agostinjani mis-seklu erbatax ’il quddiem. In-nies ta’ Għar il-Kbir kienu suġġett ta’ studju interessanti minn Joseph Borg fil-ktieb li għadu kif ippubblika bl-isem 'Documents on Għar il-Kbi, Malta, 1588-1733'. In-nutara qalbu l-isem għal-Latin “Antrum” jiġifieri Għar u “Magnum” jiġifieri kbir. Fil-verità, hawn ma hawnx għar, iżda kumpless ta’ għerien, xi wħud minnhom anki tħaffru mill-istess nies li kienu jgħixu fihom.