Varjazzjoni djalettali fil-qasam lessikali tal-helu

Abstract

L-ewwel kapitlu jiffoka fuq studji preċedenti bħalma huma l-ilsien Malti u l-Malti standard, id-djalettoloġija, l-istudjużi tad-djalettoloġija, il-varjazzjoni fl-ilsien Malti u s-soċjolingwistika. Fit-tieni kapitlu, dan l-istudju janalizza l-proċess tax-xogħol li użat Rapa. Jispjega wkoll il-metodu użat sabiex inkisbu r-riżultati tal-varjazzjonijiet lessikali, kif ukoll l-għażla tal-varjabbli soċjolingwistiċi użati fl-istħarriġ. L-intervisti saru ma’ disgħin mara miż-Żejtun, li nqasmu f’żewġ gruppi ta’ etajiet; żgħażagħ u anzjani. It-tielet kapitlu janalizza r-riżultati ta’ dan l-istudju. Ir-riżultati qed jingħataw f’persentaġġi, dan sabiex wieħed jagħraf kemm-il darba ntqal kull varjant partikolari miż-żewġ gruppi ta’ etajiet; iż-żgħażagħ u l-anzjani kif ukoll fit-tliet zoni Żwieten. Mill-analiżi ġew magħrufa l-varjanti mitkellma f’Għawdex, dawk mitkellma fiż-Żejtun kif ukoll dawk komuni bejn it-tnejn. Pereżempju ż-Żwieten jużaw aktar varjanti meta pparagunati mal-Għawdxin. Ħaġa oħra hi li varjazzjonijiet lessikali dehru aktar fuq bażi ta’ età milli fuq bażi ġeografika. Sabiex it-termini jiġu mifhuma aħjar minn dawk li jaqraw dan l-istudju, tingħata spjegazzjoni tagħhom skont iż-żewġ dizzjunarji ewlenin; dak ta’ Aquilina kif ukoll dak ta’ Serracino Inglott. Madanakollu, xi termini użati fl-istħarriġ mhumiex inklużi fid-dizzjunarji.