“Stajna għażilna l-kapriċċ tal-imħabba” : il-poeżija soċjopolitika ta’ Adrian Grima

Abstract

Dan l-istudju jittratta l-poeżiji soċjopolitiċi ta’ Adrian Grima fit-tliet ġabriet ta’ poeżija tiegħu, ‘It-Trumbettier’, ‘Rakkmu’, u ‘Klin u Kapriċċi Oħra’. L-interess ewlieni tat-teżina huwa li jagħraf lil Grima bħala poeta intellettwali b’impenn li jindirizza lil Malta kontemporanja. Għaldaqstant, l-istudju se jiffoka fuq dawk il-poeżiji li bihom Grima jidentifika l-kwistjonijiet l-aktar politiċi (u ċentrali) ta’ pajjiżu jiġifieri, l-ambjent, ir-razziżmu, l-iżbilanċ ekonomiku, il-partiġjaniżmu u l-identità nazzjonali. Bl-użu tat-teorija Marxista u tal-ekokritika, din it-teżina se tinkwadra l-poeżija ta’ Grima f’qafas storiku li introduċa fehmiet politiċi ġodda fost il-ħassieba u l-kittieba tal-avangwardja Maltija, appuntu l-lament tal-ambjent maqtul u s-soffokazzjoni; it-tħassib bl-ideoloġija leminija speċjalment fir-rigward tal-immigrazzjoni; l-eżawriment bilproblema apparentament perenni tal-iżbilanċ ekonomiku irrispettivament mit-tmexxija tal-pajjiż u l-filosofija neoliberali; id-diżappunt bil-wirt tat-tradizzjoni partiġjana; u r-rifjut tal-kunċett ta’ identità nazzjonali. L-istudju jikkomponi profil ta’ kittieb mhux biss b’tendenzi xellugin iżda b’attitudni kożmopolitana li jafu jpoġġuh f’kuntrast mal-istatus quo u maċ-ċittadinanza popolari.