Storja ta' l-estetika letterarja Maltija

Abstract

Mudelli diversi ta' l-istorja ta' l-estetika x' aktarx jippreżentaw żewġ diffikultajiet ewlenin, waħda għandha x'taqsam ma' l-unita u l-oħra ma' l-unicita. Ta' l-ewwel twassal għat-tieni. L-unita trid titfittex fl-oġġetti qabel ma jinbidlu f'kontenut tal-binja storjografika. L-unita li kull storja tfittex li toħloq m'hijiex tal-fatti iżda l-mixja kontinwa li titfa' dawl fuq ipotesi storika u teoretika. Xhieda ta' dan huma d-diversi kitbiet ta' storja ta' l-estetika għax l-istorja ma tinkitibx darba biss iżda tibqa' tinkiteb kontinwament. B. Croce, bħala estetista ewlieni Taljan tal-bidu tas-seklu għoxrin, jistqarr li storja ta' l-estetika li hija fergħa filosofika, ma tistax titqies bħala storja ta' problema waħda li l-bniedem kellu jħabbat wiċċu magħha matul sekli sħaħ, iżda hi storja ta' għadd ta' problemi partikulari u dejjem ġodda u li bil-mod il-mod matul is-snin kienu solvuti jew ħadulhom posthom oħrajn ġodda. [...]