San Ġużepp u l-Evanġelju skont San Mattew

Abstract

L-isem ta’ Ġużeppi, ir-raġel ta’ Marija, mhuwiex wieħed li jiddomina l-paġni tal-Evanġelji. Pjuttost dan il-personaġġ bibliku jissemma l-aktar fl-hekk imsejħa ‘rakkonti tat-twelid u t-tfulija’ jew ‘tal-ħajja moħbija’ ta’ Ġesù li nsibuhom fl-ewwel żewġ kapitli tal-Evanġelju skont San Mattew u San Luqa. Bl-eċċezzjoni ta’ dawn ir-rakkonti, l-isem ta’ Ġużeppi jgħib mir-rakkonti tal-Evanġelju, għalkemm l-Evanġelista San Ġwann isemmih darbtejn: l-ewwel, fir-rakkont tas-sejħa ta’ Natanjel, fejn naqraw: “Filippu sab lil Natanjel u qallu: ‘Sibna lil dak li fuqu kitbu Mosè fil-Liġi, u l-profeti fil-kotba tagħhom: Ġesù ta’ Nazaret, bin Ġużeppi’” (Ġw 1:45); it-tieni, fir-reazzjoni għad-diskors ta’ Ġesù fuq il-ħobż ħaj: “U bdew jgħidu: ‘Dan mhuwiex Ġesù bin Ġużeppi?’” (Ġw 6:42). Fl-istorja ta’ meta Ġesù ma ġiex milqugħ min-nies ta’ Nazaret, skont kif mogħtija minn San Luqa, naqraw ukoll: “Dan mhuwiex bin Ġużeppi?” (Lq 4:22). Is-silenzju tombali fuq Ġużeppi fl-Evanġelju skont San Mark, l-ewwel Evanġelju, faċilment jindikalna li Ġużeppi kien diġà mejjet qabel ma Ġesù sar figura pubblika. [silta]