L-istat tan-nazzjon 2021

Abstract

L-idea wara l-konferenza u stħarriġ bit-tema ‘L-istat tannazzjon’ twieldet waqt konversazzjoni każwali bejnietna. Bi triqat differenti konna qisna wasalna għall-istess żewġ ħsibijiet fl-istess ħin. Ridna li nifhmu b’mod profond x’inhi l-qagħda tan-nazzjon Malti llum, allura l-istat tan-nazzjon. Fl-istess ħin ridna nfakkru u nappellaw li f’demokrazija l-istat huwa tan-nazzjon. Is-sbuħija tal-ilsien Malti ppermettitilna li nesprimu ż-żewġ ħsibijiet fi frażi waħda. Fuq dan il-pedament bnejna l-viżjoni għal dan l-istħarriġ u konferenza, viżjoni li riedet twassalna biex nifhmu aħjar min hu l-poplu Malti, kif jaħseb, x’valuri jħaddan u x’inhuma dawk l-elementi li verament jiddifenuh. Sikwit tiġi ppubblikata riċerka li tiffoka fuq ċerti aspetti, opinjonijiet, drawwiet u perċezzjonijiet taċ-ċittadin Malti. Aħna ridna nagħmlu xi ħaġa differenti. Ridna nidħlu iktar fil-fond u nippruvaw nidentifikaw x’qed iwassal għal dan kollu. L-ambizzjoni tagħna ma kinitx li nsiru nafu l-opinjoni tal-Malti fuq din il-materja jew l-oħra, imma li niflu millqrib dak li jista’ qed iwassal għal dik l-opinjoni. L-għodda li użajna biex inwettqu din il-viżjoni kienet sondaġġ oġġettiv, xjentifiku u demografikament rappreżentattiv talpopolazzjoni kollha. [Silta minn Vincent-Anthony Marmarà u Lou Bondì]