Il-ħniena fl-Evanġelju skont San Ġwann : il-ħniena quddiem id-dnub (Ġw. 7, 53 - 8, 11)

Abstract

Il-lingwaġġ tal-ħniena espress bi tliet nomi bil-Grieg- eleos, oiktrimos u splanchnon - li jintuża fit-Testment il-Ġdid huwa kompletament nieqes fil-vokabularju tal-Evanġelju skont San Ġwann. Dan forsi minħabba li l-enfasi f'dan l-evanġelju mhijiex dwar il-ħniena ta' Alla murija f'Ibnu Ġesu Kristu, daqskemm id-dehra tal-glorja u tar-rivelazzjoni ta' Alla li dehret fil-Verb [logos] inkarnat. Madanakollu, f’dan l-istess evanġelju hemm episodju, f'forma ta' rakkont, li jesprimi b'mod konkret il-ħniena ta' Alla murija f'Ibnu Ġesu. Dan hu l-episodju li baqa' magħruf bħala “l-mara li nqabdet fl-adulterju" (Ġw. 7, 53-8, 11). F’dan l-artiklu ser nikkonċentraw fuq dan l-episodju, li l-Knisja aċċettatu bħala Parti mit-test ispirat u kanoniku, biex naraw kif il-ħniena ta' Alla murija f'Ibnu Ġesu mhux biss tikkuntrasta l-ipokrisija tal-qalb iebsa ta' dawk li jippruvaw jieħdu l-post ta' Alla, li hu waħdu 'mħallef', imma wkoll sabiex naraw kif din il-ħniena tagħti lill-bniedem l-opportunita li jibda ħajja ġdida u ħielsa.