Il-misteru tal-Inkarnazzjoni f'Santa Marija Maddalena de' Pazzi

Abstract

Fost il-ħafna affarijiet li hemm miżmuma b'għożża fil-Monasteru ta' Santa Marija tal- Anġli ġewwa Firenze, insibu żewġ xbihat tal-injam sbieħ ta' Ġesu Bambin. Wieħed mimdud għeri ħuta b'subgħajh f'ħalqu u ieħor bilwieqfa liebes ta' sultan. Li jorbot iż-żewġ statwi huwa l-fatt li dawn kienu meqjusa b'għożża liema bħalha minn Santa Marija Maddalena de' Pazzi. Waħda minnhom ukoll kienet xbieha li biha f'idejha, il-qaddisa kienet tintilef f'estasi hija u tikkontempla l-misteru tal-Inkarnazzjoni, jiġifieri l-misteru tal-Verb ta' Alla, jew il-Kelma ta' Alla, li titlaħħam fostna. F'dan il-misteru, l-Iben ta' Alla li kien minn dejjem u li ma jidhirx, deher fostna bħala bniedem, tlaħħam, ħa fuqu n-natura umana tagħna, għamilha tiegħu. Il-qaddisa kellha devozzjoni kbira lejn dan il-misteru hekk li isimha wkoll fil-Karmelu kien Maria Maddalena del Verbo Incarnato, jiġifieri, Marija Maddalena tal-Verb magħmul laħam.