Il-qima u d-devozzjoni lejn San Ġużepp fl-Ordni Karmelitan

Abstract

Bħalma lkoll nafu, fis-sena 2020 il-Knisja fakkret għeluq il-150 sena mill- Promulgazzjoni tad-Digriet Quemadmodum Deus tal-Papa Beatu Piju IX li bih huwa għaraf lill-Patrijarka San Ġużepp bħala Patrun tal-Knisja Universali. Diġà fl-10 ta’ Settembru 1847, il-Kongregazzjoni tar-Riti Mqaddsa kienet estendiet il- festa tal-Patroċinju ta’ San Ġużepp fuq il-Knisja Universali bid-digriet tal-istess Papa Inclytus Patriarcha Joseph. Fil-Konvokazzjoni tal-Konċilju Vatikan I, tressqu quddiem il-Papa diversi talbiet sabiex jipproklama lil San Ġużepp Patrun tal- Knisja Universali u jkabbar il-kult lejn San Ġużepp. Il-Beatu Papa Piju IX nnifsu kien devot kbir ta’ San Ġużepp u Sekular Franġiskan. Minħabba li l-Konċilju kellu jieqaf ħesrem għal diversi diffikultajiet, din il-proklamazzjoni ma seħħitx qabel it-8 ta’ Diċembru 1870. Nhar is-7 ta’ Lulju 1871, l-istess Papa ħareġ l-ittra appostolika Inclytum Patriarcham.