S. M. Maddalena de' Pazzi : kontemplazzjoni tal-Verb Umanat

Abstract

Santa M. Maddalena de' Pazzi {1566-1607), qaddisa Karmelitana minn Firenze, hija meqjusa figura importanti oħra fl-Ordni Karmelitan għaliex tirrakkontalna l-avventuri tal-ħajja magħquda ma' Alla mimlija mħabba. Iżda dan tagħmlu b'mod għalkollox partikolari. Filwaqt li Santa Tereża ta' Ġesu u San Ġwann tas-salib jispjegawlna b'intwizzjonijiet mill-isbaħ il-vjaġġ mistiku b'testi li kitbu huma stess, fil-każ ta' Maddalena de' Pazzi, bħal Ġwanni ta' San Sansun, għandna l-privileġġ li nesploraw magħha direttament id-drama talunjoni tagħha ma' Alla. Dan għaliex il-qaddisa qatt ma kitbet opri spiritwali ħlief għal xi ittri jew kitbiet żgħar. It-testi tagħha li għandna f 'idejna, bħal dawk ta' Ġwanni ta' San Sansun, huma kollha traskrizzjonijiet li għamlu s-sorijiet sħabha waqt li kienu jkunu preżenti għall-mumenti meta l-qaddisa kienet tidħol f'estasi jew meta kienet tkun timmedita u taħseb tgħajjat dwar l-avventura ta' ruħha mal-Maħbub Divin. Għaldaqstant, ma għandniex f'idejna riflessjonijiet dwar l-esperjenza spiritwali, imma l-esperjenza stess, fid-drama kollu tagħha . Dan jagħmel l-opri ta' Maddalena de' Pazzi intriganti iżda kumplessi fl-istess waqt.