Ġwanni ta' San Sansun : Il-veru spirtu tal-Karmelu

Abstract

Meta wieħed jiġi biex jaqbad f'idejh il-kitbiet ta' fra Ġwann ta' San Sansun żgur li mill-ewwel jintebaħ bil-profondità ta' dan il-mistiku Karmelitan. Il-kitbiet tiegħu mhumiex ftit, b'kollox il-manuskritti tiegħu jgħoddu mal-erbat elef paġna. Imma minkejja l-ammont daqs tant kbir ta' kitbiet, nistgħu ngħidu li mill-figuri l-kbar talispiritwalità Karmelitana, fra Ġwann forsi huwa l-inqas magħruf, saħansitra fl-Ordni Karmelitan innifsu. Ir-raġunijiet huma diversi. L-ewwel u qabel kollox, l-istorja mqallba tal-Ordni Karmelitan fi Franza matul dawn l-aħħar tliet sekli ma ħallewx wisq spazju għall-possibbiltà li jikber u jinfirex l-għarfien ta' dan il-mistiku. It-tieni, bħal kitbiet ta' Santa Marija Maddalena de' Pazzi, il-kitbiet ta' fra Ġwann, minħabba li kien agħmi, huma traskrizzjonijiet li n-novizzi kienu jagħmlu waqt li dan kien ikellimhom. Minħabba f'hekk, il-kitba, apparti li hi bi Franċiż antik, hija djalogali u diffiċli biex tara fiha xi ħjiel ta' ordni jew ħsieb magħqud. Madanakollu, il-ġmiel u l-profondità tat-testi żgur li jagħmlu tajjeb għal dawn id-diffikultajiet.