Rikardu ta' Lavenham : Il-kontemplazzjoni u t-tisfija tar-ruħ

Abstract

Fra Rikardu twieled f'villaġġ żgħir fin-nofsinhar tal-Ingilterra, Lavenham, qrib Suffolk. Ma nafux ħafna dettalji dwar dan il-magister, pereżempju ma nafux eżatt liema sena twieled u miet. Nafu iżda li ssieħeb mal-Ordni Karmelitan f'Ipswich fejn ħa l-formazzjoni Karmelitana tiegħu, u iktar tard intbagħat jistudja fl-Università ta' Oxford minn fejn kiseb id-Dottorat fit-Teoloġija. Nafu wkoll li fl-1384 sar Pirjol tal-kunvent ta' Bristol, u iktar tard, fl-1399, insibuh Pirjol tal-kunvent ta' Londra fejn possibbilment għadda l-aħħar snin ta' ħajtu. Fra Rikardu kien figura importanti mhux biss għall-Ordni imma wkoll għar-Renju Ingliż. Dan għaliex, fost l-oħrajn, kien il-Konfessur tar-Re Rikardu II u ħabib tal-qalb tal-Arċisqof ta' Canterbury. Fra Rikardu kiteb ħafna, jingħad iktar minn sittin trattat, fosthom dwar filosofija, kożmoloġija, teoloġija, l-istorja, u l-ispiritwalità tal-Ordni tagħna.