Michele Cachia (1760-1839) : Perit agrimensur u l-irwol tiegħu fl-iżvilupp tal-pajsaġġ rurali

Abstract

Bejn l-aħħar tas-seklu tmintax u l-bidu tas-seklu dsatax, I-iżvilupp t'art agrikola wassal għal tibdil tal-pajsaġġ bikri modern. Dan it-tibdil jidher fost sorsi oħra f’xoghol l-agrimensur Malti, li kellu rwol centrali fid-definizzjoni u l-evalwazzjoni ta’ proprjetajiet rurali kif mitluba minn aspetti soċjali u ekonomiċi. Wieħed mill-agrimensuri mportanti f'dan iż-zmien kien Michele Cachia, arkitett-inġinier u perit agrimensur'. Minkejja s-sehem importanti tiegħu fl-agrimensura Maltija, Michele Cachia huwa rriċerkat l-aktar għall-irwol tiegħu fl-arkitettura. Studji fuq l-iżvilupp arkitettoniku Malti jindirizzaw aspett wieħed biss mix-xogħol ta’ dawn il-personalitajiet. Kif nafu, f'dan iż-zmien, ħafna kienu jaħdmu bħala arkitetti jew kapi mastri imma wkoll fl-istess waqt bħala periti agrimensuri (Spiteri u Borg 2015). Ix-xogħol ewlieni tal-agrimensur kien fil-fatt l-amministrazzjoni tal-proprjetà. B'hekk il-periti tul iż-żmien wettqu diversi spezzjonijiet ta’ proprjetajiet urbani u rurali għal ghanjiet ta’ evalwazzjoni, divizjoni u minħabba disgwid bejn proprjetarji. Illum l-agrimensur permess tad-dokumenti li ħalla huwa sors importanti għall-istudju tal-iżvilupp u l-amministrazzjoni tal-pajsagg Malti. Dawn is-sorsi tal-agrimensur għadhom ftit li xejn mfittxija.