In-Nisa f’Ħal Luqa Matul il-Perjodu tal-Ordni (1530-1798)

Abstract

Il-każijiet imsemmija f'dan l-artiklu huma kollha ddokumenti fl-arkivji, u l-parti l-kbira minnhom ġew traskritti minn Dun Ġużepp Micallef fil-ktieb imprezzabbli tiegħu, Ħal Luqa: Niesha u Ġrajjietha (1975). Imbagħad, id-deskrizzjoni tal-qagħda ġenerali tal-mara u l-isfond soċjokulturali ta' matul l-epoka tal-Kavallieri huma msejsa primarjament fuq ix-xogħol daqstant ieħor eċċellenti tal-Prof. Cannel Cassar, Daughters of Eve (2002). Xogħli kien li ninkwadra r-rakkonti pprovduti minn Micallef fil-qafas teoretiku ta' Cassar. Għaldaqstant dan hu bażikament xogħol ta' sintesi; il-qofol tal-materjal jistrieħ fuq xogħol imwettaq qabli minn ħaddieħor, imma n-nisġa tagħhom f'narrattiva koerenti hija kompletament tiegħi. L-istorja ħafna drabi nkitbet mill-irġiel u n-narrattiva tagħhom kellha, aktar iva milli le, protagonisti maskili u setgħana - slaten, nobbli, kavallieri, ġenerali, politiċi, u l-bqija. Kien bis-saħħa tal-istorja soċjali li bdejna nsiru midħla, ftit jew wisq, ta' nies ta' mingħajr awtorità u mezzi, nies komuni bla pretensjonijiet u influwenza - raħħala, ħaddiema, qaddejja, bejjiegħa, baħħara, u l-bqija. Kien għalhekk ukoll li fl-aħħar bdejna nsiru nafu xi ħaġa dwar l-esperjenzi ta' nisa ordinarji li għexu ħajja anonima, normalment fid-dell ta' żwieġhom - aktarx ħajja iebsa, kultant anki miżerabbli.