Dawn inkitbu biex intom temmnu : studji fuq l-Evanġelju u l-Ittri ta’ San Ġwann, u l-Apokalissi

Abstract

Ir-Raba’ Evanġelju jew kif inhu aktar magħruf, l-Evanġelju skont San Ġwann, minn dejjem kien jaffaxxinani. Kont għadni fl-istudji tat-Teoloġija fil-Fakultà tat-Teoloġija fl-Università ta’ Malta, meta niftakarni nieħu b’serjetà kbira l-lezzjonijiet li kien ikollna dwar dan l-Evanġelju mogħtija lilna mill-mibki Rev. Dr Joseph Calleja OFMConv. Dan l-interess żdied aktar fija meta kienu waslu l-eżamijiet finali tat-Teoloġija u kont ippreparajt ruħi sewwa bi ktieb li għadu ħafna għal qalbi, miktub minn Ignace de la Pottierie, The Hour of Jesus: The Passion and the Resurrection of Jesus according to John (Slough: St Paul’s Publications, 1989). Fl-1994, jiġifieri ftit wara li spiċċajt l-eżamijiet tat-Teoloġija, kelli l-okkażjoni nieħu sehem f ’Simposju Internazzjonali li kien sar f ’Efesu fit-Turkija, il-post li tradizzjonalment huwa marbut mal-Evanġelista San Ġwann. Hemmhekk bla mistenni kelli x-xorti li niltaqa’ personalment ma’ de la Potterie, bħala wieħed mill-kelliema ta’ dan is-Simposju. Ftit wara, mill-1995 sal-1998, komplejt l-istudji tiegħi fl-Università ta’ Oxford. Hemmhekk kont residenti fil-Kulleġġ ta’ Greyfriars, immexxi mill-Patrijiet Kapuċċini Ingliżi, bħala parti mill-Università prestiġjuża ta’ din il-belt antika. F’dawn is-snin ta’ studju intensiv kelli l-grazzja napprofondixxi fit-testi bibliċi, b’mod speċjali, fit-Testment il-Ġdid, kif ukoll fl-interpretazzjoni biblika tal-Missirijiet tal-Knisja. Dan minħabba li t-teżi tiegħi kienet tikkonċerna t-tema tal-Ubbidjenza ta’ Kristu fl-Evanġelju skont San Ġwann kif imfissra fil-Kummentarju dwar dan l-Evanġelju miktub minn San Ċirillu ta’ Lixandra, b’konfront mal-presuppożizzjonijiet duttrinali li żviluppaw fil-Knisja fuq bażi tal-istess Evanġelju.