Duminku ta’ S. Albert (1596-1634) : il-kontemplazzjoni bħala attenzjoni għal Alla

Abstract

Vincent Eschard twieled ġewwa r-raħal ċkejken ta' Fougeres, fir-reġjun tal-Bretanja ġewwa Franza, nhar Ħadd il-Għid 14 t'April 1596, minn Guillame Eschard u Agathe Le Maignan. Vincent kellu ħamest aħwa, tlieta li mietu ta' età żgħira, oħtu li kienet marradija, filwaqt li oħtu l-oħra ddedikat ħajjitha għall-kura tal-fqar u l-moribondi. Trabba f'familja Nisranija devota. Il-ġenituri tiegħu rawmuh fiddevozzjoni tat-talb, fl-għoti tal-karità, fis-sawm, u fil-prattika tal-virtujiet. Il-bijografi jiddeskrivulna lil Vincent bħala tifel ferrieħi u kollu enerġija . Huwa ħa l-edukazzjoni tiegħu ġewwa l-Kulleġġ ta' San Tumas f'Rennes li kien immexxi mill-Ġiżwiti. Vincent kien ta' spiss jiffrekwenta l-kunvent tal-Karmelitani ġewwa Rennes, speċjalment waqt it-talb u l-purċissjonijiet għall-kor, u fil-fatt minn età żgħira kien juri x-xewqa li j issieħeb mal-Karmelitani, iżda kellu jistenna diversi snin sakemm jagħlaq il-ħmistax-il sena biex dan iseħħ. Sadanittant, huwa kompla jieħu l-edukazzjoni tiegħu mal-Ġiżwiti.