Il-Mulej Alla bħala karattru fin-narrativa tar-raba' Evanġelju

Abstract

L-Evanġelju skont San Ġwann mhuwiex sempliċiment narrativa dwar il-ħajja ta’ Ġesù li terraq bejn il-Galilija, is-Samarija u l-Lhudija. Permezz ta’ din narrativa, l-awtur pjuttost jipprova jipperswadi lill-qarrejja li Ġesù huwa l-Messija, l-Iben ta’ Alla. Kull karattru li jissemma f ’din in-narrativa huwa parti minn din l-istrateġija. Dan jinkludi l-karattru ta’ Alla/ il-Missier muri bħala dak li jħobb lid-dinja, li ta lil-Ibnu u li bagħat lil Ibnu fid-dinja biex jagħti l-ħajja lil dawk li jemmnu. F’dan l-istudju se naraw kif il-mod li bih jiġi ppreżentat Alla bħala karattru f ’dan l-Evanġelju jservi biex jawtentika t-tagħlim ta’ Ġesù u biex jassoċja lil Ġesù ma’ Alla ta’ Abraham, ta’ Iżakk u ta’ Ġakobb.