Il-Kitba tal-Varjanti Ortografiċi fil-Malti - Osservazzjonijiet u Suġġerimenti

Abstract

Huwa fatt magħruf li ż-żmien idaħħal drawwiet ġodda fkull qasam tal-ħajja, mill-mod ta' kif naħsbuha, sal-mod li bih inwettqu fil-prattika dak li naħsbu, inkluż l-għodda li tgħinna nwettqu dak li naħsbu. Iż-żmien li jgerbeb minn fuqna jġib miegħu, fost oħrajn, bidla fil-mod ta' kif inżommu ruħna ħa nidhru sbieħ fgħajnejn ħaddieħor, fil-mod ta' kif għandna naħdmu, niddevertu, nieklu u mhux anqas, nitkellmu u niktbu. Għax il-lingwa hija r-rifless tas-soċjetà u la darba s-soċjetà li titkellimha tinbidel, il-lingwa trid tinbidel magħha inkella ma tibqax taqdi l-ħtiġijiet ta' l-istess soċjetà u maż-żmien ikun hemm is-sogru li titwarrab u tintilef kif ġralhom bosta ilsna. Minħabba fhekk, kliem li jirreferi għal affarijiet li ma jibqgħux jeżistu aktar isir arkajku. Kliem ieħor ikollu jikkompeti ma' kliem missellef minn xi lingwa oħra u jew jibqa' jeżisti b'tifisra kemxejn differenti minn dik oriġinali jew inkella fl-aħħar ikollu jċedi postu għall-kelma l-ġdida li tidħol għax tassew ikun hemm bżonnha jew inkella b'mod kapriċċuż.