Mons. Carmelo Psaila : Assistent Librar u Direttur tal-Libreriji Distrettwali

Abstract

Bir-raġun kollu Dun Karm jitqies bħala wieħed mill-pilastri tal-letteratura Maltija u ismu x'aktarx li huwa sinonimu mal-kitba tal-versi tal-innu Malti u mà xogħlijiet kbar bħal 'Il-Jien u Lil Hinn Minnu; 'Non Omnis Moriar: 'Għaliex? - Jedd il-Lsien Malti', 'Waħdi; 'Żagħżugħ ta' Dejjem; 'L-Oqbra' u oħrajn. Madanakollu, ħidmitu bħala Assistent Librar u Direttur tal-Libreriji Distrettwali ta' spiss ninjorawha. Rari nitkellmu dwar Dun Karm l-amministratur, aspett li seta' influwenzah fil-kitba tax-xogħlijiet letterarji tiegħu. Din il-pubblikazzjoni tiffoka sewwasew fuq dan l-aspett x'aktarx minsi ta' Dun Karm billi tiddiskuti numru ta' dokumenti amministrattivi. Ir-riċerka ta' Joanne Sciberras hija bbażata fuq dokumentazzjoni interna ta' Malta Libraries, kif ukoll fuq pubblikazzjonijiet uffiċjali bħalma huma l-Malta Blue Books. Dan ix-xogħol jittratta wkoll l-evoluzzjoni ta' Malta Libraries u l-legat li Mons. Carmelo Psaila, kif kien magħruf fid-dokumenti uffiċjali amministrattivi, ħalla warajh fil-qasam tal-Libreriji f' Malta u Għawdex. Din hija pubblikazzjoni oħra fis-sensiela ta' pubblikazzjonijiet dwar Dun Karm li qed jippubblika d-Dipartiment tal-Malti fl-Università b'rabta mat-taħditiet li jiġu organizzati kull sentejn bis-sehem tal-fondazzjoni Karmen Mikallef Buħaġar.