Il-ġens grammatikali li jieħdu fil-Malti n-nomi ta' nisel Ingliż

Abstract

Il-kategorija tal-ġens grammatikali tista' titqies bħala waħda mill-akbar enigmi tax-xjenza lingwistika u l-komplikazzjonijiet marbuta magħha setgħu naffiu lil xi studjużi reċenti milli jittrattawha fil-fond. Iżda madwar seklu ilu, dan is-suġġett kien donnu favorit ma' ħafna lingwisti u bosta kienu dawk li studjaw diversi aspetti tiegħu. Madankollu, b'xorti ħażina, ħafna minn dawn ix-xogħlijiet ta' l-imgħoddi kienu neqsin minn osservazzjoni lingwistika meħtieġa u kienu interpretati b'metodi li bl-ebda mod ma jistgħu jissejħu xjentifiċi. Il-ġens grammatikali huwa suġġett assogat ma' ħafna kontroversji u teoriji konfliġġenti minn bosta aspetti, fosthom l-oriġini tiegħu u saħansitra d-definizzjoni tiegħu bħala kategorija grammatikali. Il-kawża ta' dan in-nuqqas ta' qbil nistgħu ngħidu li tinsab fil-kategoriji sintattiċi u nazzjonali msemmija minn Jespersen (1956:58). Bosta studjużijinjoraw id-distinzjoni li Jespersen jagħmel bejn dawn iż-żewġ kategoriji. B'dan il-mod, f'bosta mix-xogħlijiet dwar dan is-suġġett, il-kategorija sintattika tal-ġens ta' spiss tħalltet, u għadha titħallat, mal-kategorija nazzjonali li tikkorrispondi magħha, jiġifieri dik tas-sess