Il-vjaġġ it-tajjeb! Essential Maltese for ground & cabin crew

Abstract

Dan il-frażarju bilingwi hu qabelxejn maħsub għall-impjegati tal-ajruport u għall-membri tal-ekwipaġġ tal-ajru. Kemm jekk xogħlok fuq l-ajruplan u kemm jekk taħdem l-ajruport, fl-industrija tal-avjazzjoni jiswielek li tikkomunika b’mod effettiv. Din il-gwida prattika tfasslet biex fiha ssib il-kliem u l-aktar frażijiet utli bil-Malti li jkollok bżonn f’xogħlok. Il-frażarju jkopri ħafna oqsma, mill-protokolli tas-sigurtà sal-għajnuna lill-passiġġieri, u għandu jservik ta’ referenza għall-komunikazzjoni bil-Malti mal-passiġġieri u l-kollegi. Il-pubblikazzjoni hi maqsuma fi tmien partijiet li jidħlu f’aspetti differenti tal-ħidma fl-avjazzjoni: L-ajruport, Fuq l-ajruplan, Ikel u xorb, Oġġetti personali, Nies, Għajnuna, Frażijiet utli, u Mistoqsijiet. Il-kliem ewlieni hu mniżżel ukoll f’lista komda fuq wara tal-ktieb, imqassma alfabetikament, mill-Ingliż għall-Malti. Minbarra din il-verżjoni stampata, fis-sit www.malti.mt/learnmaltese ssib il-kliem u l-espressjonijiet kollha moqrija. Dan jgħin lil min ikun qed jitgħallem il-Malti biex jippronunzjah aħjar u jifhmu aktar. Din ir-riżorsa hija ħolqa minn sensiela maħsuba mid-Dipartiment tal-Malti fl-Università għal diversi professjonisti u l-pubbliku ġenerali li jaħdmu f’Malta u jixtiequ jitħaddtu bil-Malti. Kemm jekk għadek tasal fostna u kemm jekk inti membru tal-ekwipaġġ li waqgħetlek żokortok f’dan is-settur, dan il-frażarju għandu jgħinek tikkomunika aħjar bil-Malti fid-dinja tal-avjazzjoni. Il-vjaġġ it-tajjeb!