Il-funzjoni avverbjali ta’ forom aġġettivali

Abstract

Minkejja li l-kliem fil-lingwa nikklassifikawh f ’partijiet tad-diskors, dan ma jfissirx li ma jistax jaqdi funzjonijiet oħra li tradizzjonalment jintrabtu ma’ partijiet tad-diskors oħra. Dan l-artiklu se jipprova jixħet dawl fuq l-aġġettiv li xi minn daqqiet jieħu funzjoni avverbjali fil-Malti bħal f ’eżempju 1. [1] L-istudenti marru tajjeb. Ħafna drabi l-letteratura teknika tisħaq li l-funzjoni avverbjali ma tinflettix għall-kategoriji grammatikali, bħall-għadd u l-ġens, bi qbil mal-parti tad-diskors immodifikata. Iżda bħala kelliema nattiva konxja li dan mhuwiex dejjem minnu, kif jixhed eżempju 2. [2] Is-siġar jikbru dritti. Minħabba n-natura konċiża ta’ dan l-istudju, nillimita ruħi għal numru ta’ aġġettivi. L-iskop ewlieni ta’ dan l-artiklu hu li jistħarreġ kemm fil-prattika hija ċentrali l-funzjoni avverbjali bil-karatteristika tan nuqqas ta’ qbil inflettiv filwaqt li jfannad fir-raġunijiet li jistgħu jwasslu biex dan in-nuqqas ma jseħħx.