Ma’ kull qatra semm li sqejtna mal-mejda : il-piż tal-familja fil-poeżija ta’ Antoine Cassar

Abstract

Minħabba l-influwenza Kattolika, sa qabel l-Indipendenza, dak li kien meqjus bħala l-fus tal-fidi kien meqjus ukoll il-fus tas-soċjetà. Dan kien jgħodd ukoll għall-kunċett tal-familja. Il-Kristjaneżmu kkontribwixxa għall-ispiritwalizzazzjoni taż-żwieġ u l-ħajja fil-familja, u ħoloq kultura ġdida vis-à-vis ir-relazzjoni bejn iż-żewġ imseħbin taż-żwieġ, u dik bejn il-ġenituri u l-ulied. Il-familja saret l-arketip tal-knisja nnifisha u għalhekk il-fus tal-Kristjaneżmu. Dan irrifletta ruħu fil-poeżija Maltija ta’ dak iż-żmien, speċjalment permezz ta’ Dun Karm. Oliver Friggieri jikkummenta li Dun Karm dejjem jammira lill-familja u jaraha bħala l-qofol tas-sistema soċjali kollha. F’poeżiji bħal “Omm”, “Univers Ieħor” u “Żjara lil Ġesù”, id-dar tal-familja hija ppreżentata bħala santwarju, it-tarbija hija mwennsa mill-omm, waqt li l-missier huwa s-sid tad-dar u għalhekk kap tal-familja. Dan huwa wkoll eku tal-enċiklika Rerum Novarum tal-1891 tal-Papa Ljun XIII, li tqis lill-familja bħala predeċessur tas-soċjetà ċivili, lill-missier bħala kap tal-familja, u lill-ulied bħala proprjetà u espansjoni tal-personalità tiegħu.