Kulħadd jgħid li jrid?

Abstract

L-Artikolu 41 tal-Kostituzzjoni ta' Malta kif ukoll l-Artikolu 10 tal-Konvenzjoni Ewropea dwar id-Drittijiet tal-Bniedem (liema konvenzjoni tagħmel parti mill-corpus juris tagħna permezz tal-Att dwar il-Konvenzjoni Ewropea, jiġifieri l-Kapitolu 319 tal-Ligijiet ta' Malta) huma ċari fis-sens li dawn iridu li pajjiżna jipproteġi l-libertà tal-espressjoni. Huwa f'dan l-isfond li, għal żmien twil, inħass il-bżonn li l-libertà tal-istampa f'dan in-nazzjon tigi ssalvagwardjata, billi din hija wieħed mill-ingredjenti fundamentali ta' kull soċjetà demokratika. Wieħed ma jistax, pero, jiskarta l-fatt li, f'saltna tad-dritt, fejn allura d-drittijiet fundamentali tal-persuna huma s-sisien ta' kollox, ir-reputazzjoni tal-persuna hija wkoll dritt fundamentali li wieħed irid daqstant iħares. Ir-reputazzjoni ta' dak li jkun, darba mittiefsa, tista' twassal għal riperkussjonijiet mentali għas-sofferent.