L-istrateġija psikostilistika f’Dun Karm

Abstract

Li se ngħid hu li Dun Karm (1871-1961) inqeda bl-elementi tan-novella f'waħda mill-poeżiji tiegħu biex iwassal il-messaġġ meħtieġ. Biex nifhmu dan irridu nħarsu lejn Dun Karm b'mod differenti mis-soltu. Is-soltu narawh poeta ¾ issa se narawh poeta-novellist. Dan l-istudju juri metodu ta' investigazzjoni ta' poeżija bbażat fuq il-qagħda mentali tal-poeta (u għal din se nieħu t-teorija ta' l-iskema), ir-rappreżentazzjonijiet tal-ħsieb (u hawnhekk se naraw il-proċessi differenti li juża l-poeta, xi wħud minnhom insibuhom komuni ħafna fil-proża narrattiva kif rajna diġà), u l-pjan ta' assistenza ritmika (jiġifieri kif il-poeta jinqeda bir-ritmu biex iwieżen it-tifsir).1 U dan kollu biex isawwar ambjent testwali li minnu joħroġ l-istil mentali ta' Dun Karm. Kollox jidderiġina lejn aspetti tematiċi li jridu jseddqu d-dehra mentali tal-poeta. Se nipprova nuri hawnhekk kif għallanqas f'poeżija waħda minn tiegħu Dun Karm inqeda bit-teknika tal-proża narrattiva biex iwassal il-messaġġ tiegħu. Għalhekk nemmen li dan il-metodu jżid mal-kompetenza letterarja, għax jinvestiga implikazzjonijiet psikoloġiċi u morali, u għaldaqstant irrid narah bħala metodu psikostilistiku li jikkombina l-psikoloġija narrattiva ma' l-istilistika letterarja u l-istil mentali.2 Dan kollu biex nuri kif Dun Karm iħaddem id-djalogiżmu tiegħu bejn żewġ attitudnijiet: l-umanità u l-ispiritwalità. Imma l-ewwel ikolli nispjega xi żewġ affarijiet.