Il-flawt maġiku : l-użu tal-opri fit-tagħlim tal-Malti għall-istudenti tal-ħames sena fil-primarja

Abstract

Din id-dissertazzjoni/proġett qed taspira lejn kif l-ġeneru tal-opra jista’ jintuża bħala għodda ta’ tagħlim tal-Malti fil-primarja. Għalkemm il-Kurrikulu Nazzjonali (2012: 23) jagħti importanza lill-kultura Maltija, u s-Sillabu tal-ħames sena tal-primarja tal-Malti (2020:5) jagħti importanza għall-użu tal-kanzunetti biex it-tfal isegwu u jqabblu s-suġġett tal-kanzunetta mal- esperjenzi tagħhom, imkien ma jissemmew l-użu tal-opri u l-apprezzament tal-mużika b’mod dirett. L-opra se tkun ir-riżorsa prinċipali ta’ dan il-proġett. F’dan il-proġett se jiġu addattati għall-Malti sitt ajri mill-opra The Magic Flute permezz ta’ sottotitli b’eżerċizzju ta’ editjar professjonali. Minn din ir-riżorsa se jinbnew sett ta’ lezzjonijiet għat-tisħiħ tal-lingwa, l-litteriżmu u l-identità kulturali Maltija fil-Malti għall-ħames sena fil-primarja. Il-ħsieb wara dan il-proġett huwa mnebbaħ mill-gwida għall-edukaturi fuq il-pedagoġija u l-assessjar tal-kisbiet mit-tagħlim tas-suġġett tal-Malti u Litteriżmu tas-Simboli (Gellel, 2018). F’dan il-proġett ġew identifikati l-kisbiet mit-tagħlim marbutin mal-ħiliet tat-taħdit, smigħ, qari fuq livell 6 (il-Qafas tal-Kisbiet mit-Tagħlim: 2015: 16-19).