Min jien? : it-tagħlim ta' Bħagawan Xri Ramana Maħarxi

Abstract

Il-ktejjeb li għandek f’idejk huwa ġawhra tal-ispiritwalità mgħoddija minn Xri Ramana Maħarxi għaref u mistiku Indjan li xerred il-metodu tal-istħarriġ tal-jien innifsi bħala mezz li jwassal sabiex jintlaħaq l-għarfien tal-istess, ta’ dak li tassew int, li bl-Ingliż jissejjaħ selfrealisation. Hemm fil-fatt relazzjoni bejn l-għarfien u l-Kewn f’dan il-proċess. Dan ilmetodu jinbena fuq il-mistoqsija “Min jien jien?” – fil-ħidma tat-tfittxija ġewwinija għallgħeruq tal-ħsieb jien, bil-għan li l-ego (il-jien) jixxejjen u jqum u jinkixef il-veru jien: il- Kewn. Id-Din ta’ Ramana Maħarxi huwa marbut mal-filosofija msejħa Adwajta Wedanta, li fiha r-ruħ (ātman) u l-Bidu aħħari, Dak li Hu (Braħman) huma ħaġa waħda. “Min jien jien?” tieħu lil min jitħarreġ fil-meditazzjoni kontemplattiva f’mixja ta’ ħsieb ġewwieni li twasslu għall-għarfien tal-Kewn innifsu u t-tixjin tal-ego. Is-sisien tal-ħsieb filosofiku wara dan ittaħriġ insibuhom fin-Non-Duwalità tal-Adwajta, jiġifieri, fil-Mhux-Tnejn. L-Adwajta hija waħda mis-sitt skejjel filosofiċi ewlenin tal-Indja, u minkejja li l-prinċipji tagħha huma msensla fl-Upanixad, kien Gawdapada, filosfu tas-seklu 7 WK, li taha rifda bil-kummentarju tiegħu tal-Māndukja Kārikā fuq il-Māndukja Upanixad. Gawdapada kien l-imgħallem ta’ Gowinda, l-imgħallem ta’ Adi Xankara li kiteb tifsir fuq il-Kārikā ta’ Gawdapada. Fil- Māndukja Kārikā l-istudjużi jħossu l-influss tal-iskola Buddista Maħajana li tħares ’il quddiem lejn is-saħħa ta’ kulma jgħix bit-taħriġ fil-ħsieb non-duwalista kif ukoll monista. [excerpt]