Il-pajsaġġ lingwistiku u t-traduzzjoni bħala għodda fit-tagħlim tal-Malti bħala lingwa barranija

Abstract

Din it-teżi hija l-ewwel teżi li tiffoka fuq ir-rabta tal-pajsaġġ lingwistiku mat-tagħlim tal-Malti bħala Lingwa Barranija. Għaldaqstant, permezz ta’ studji lokali u barranin, din it-teżi tistħarreġ l-effetti pożittiv tal-użu tal-pajsaġġ lingwistiku billi se jiġu ppreżentati sitta u tletin karta tat-taħriġ. Dawn il-karti tat-taħriġ huma mmirati għal-livelli A1, A2 u B1 skont il-Qafas Komuni Ewropew u jikkonsistu minn dejta bil-Malti biss, bl-Ingliż biss, u bil-Malti u bl-Ingliż. It-tliet kategoriji ta’ dejta huma marbutin mal-pajsaġġ lingwistiku Malti, speċifikament it-tabelli u l-ismijiet tat-toroq, bil-għan li l-istudenti barranin jitgħallmu l-Malti b’mod innovattiv, filwaqt li jiffamiljarizzaw ruħhom mat-tabelli pubbliċi Maltin sabiex ikunu ppreparati għad-dinja ta’ barra mill-klassi. Għalhekk, l-għan tal-karti tat-taħriġ huwa li jiġu użati għal topiks differenti, li huma l-ortografija, il-vokabolarju, it-traduzzjoni, u l-grammatika bħal ngħidu aħna n-negattiv. L-għan ta’ dan kollu huwa li niffaċilita l-mod ta’ kif l-istudenti jitgħallmu l-Malti bħala Lingwa Barranija.