It-tagħlim tal-Malti permezz tal-pajsaġġ lingwistiku

Abstract

L-għan ewlieni ta’ din it-teżi hu li tipprovdi ideat dwar kif il-pajsaġġ lingwistiku jista’ jservi bħala riżorsa għal-lezzjonijiet tal-Malti. B’mod partikolari, turi kif l-ismijiet tad-djar jistgħu jintużaw biex jipprovdu kuntest għall-proċess tat-tinqija fil-lezzjonijiet tal-grammatika jew f’taħriġiet grammatikali tal-Malti bħala lsien nattiv. Għal din ir-riċerka, bdejt billi nevalwa jekk l-ismijiet tad-djar fihomx biżżejjed elementi mħaddma tal-grammatika, u għalhekk ħadt ammont sostanzjali ta’ ritratti ta’ ismijiet tad-djar. B’kollox ġbart 340 ritratt ta’ ismijiet tad-djar u dan il-kampjun ippermettieli nanalizza liema elementi grammatikali huma preżenti. Wara l-analiżi, ħejjejt għaxar pjanijiet ta’ lezzjonijiet li jwaħħdu l-pajsaġġ lingwistiku mat-tagħlim grammatikali. Għaldaqstant stajt nuri kif il-pajsaġġ lingwistiku huwa rikk fl-istrutturi grammatikali u jista’ jintuża fit-tagħlim tal-grammatika tal-ewwel lingwa, u fl-istess ħin jgħin lill-istudenti jiżviluppaw kuxjenza tal-lingwa bħala prattika soċjali.