Il-politika tal-ġeneru f'Marta Marta

Abstract

Marta Marta ta’ Loranne Vella huwa rumanz li jista’ jitqies bħala wieħed niggieżi f’bosta sensi. Huwa rumanz ta’ kważi erba’ mitt paġna, ippubblikat minn EDE books fl-2022, u li bih Loranne Vella rebħet, għat-tieni darba, il-Premju Nazzjonali tal-Ktieb fil-kategorija tar-rumanzi. Marta Marta huwa rumanz impenjat fis-sens politiku, jiġifieri li bih l-awtriċi riedet b’mod espliċitu tagħmel punti politiċi – wara kollox, Marta Marta huwa rumanz femminist. Huwa rumanz li jqajjem numru ta’ dibattiti teoretiċi dwar il-ġeneru. Jingaġġa numru ta’ skejjel ta’ ħsieb femministi, kemm dawk li normalment huma assoċjati mat-tieni mewġa tal-femminiżmu (li fjorixxew fis-sittinijiet u s-sebgħinijiet tas-seklu għoxrin), kif ukoll kurrenti ta’ ħsieb minn paradimmi kontemporanji bħal elementi queer li jitkellmu dwar il-politika tal-pronomi, l-identitajiet nonbinarji, u l-fluwidità tal-ġeneru u s-sesswalità. Marta Marta jitqabad ukoll ma’ ideat assoċjati mal-femminiżmu radikali, kemm kif dan kien mifhum fis-sebgħinijiet minn femministi bħal Shulamith Firestone, Andrea Dworkin u Monique Wittig, imma anki dawk il-kurrenti ta’ ħsibijiet kontemporanji li jenfasizzaw distinzjonijiet netti bejn mara u raġel, u li jinsistu dwar modi partikolari ta’ kif tiġi definita mara, li jħallu barra bosta identitajiet, fosthom dawk trans.