Messaġġ ta' għeluq : id-duwaliżmu bejn l-oqsma tal-arti u l-politika

Abstract

Huwa tassew intriganti ta' kemm hija għaġna waħda r-relazzjoni bejn il-letteratura u l-politika - bejn il-poeta, ir-rumanzier u d-drammaturgu fuq naħa, u l-politiku flimkien mal-ingranaġġ tal-istat fuq in-naħa l-oħra. Il-pressjonijiet bejn iż-żewġ xaqlibiet jafu jkunu qliel, spissi u persistenti. Il-politika taf tuża lil-letteratura biex twassal il-messaġġ tal-istat, waqt li tippatrunizza u tiddottrinizza. Fuq in-naħa l-oħra tal-munita, il-letteratura ntużat kemm-il darba bħala arma ta' protesta kontra l-impożizzjoni ta' politika inġusta, inkella imposta anki jekk taħt il-paraventu ta' konsultazzjoni fiergħa. Dan id-duwaliżmu bejn in-narrattiva letterarja u politika jaf ikun kumplimentari, imma ħafna drabi huwa kkaratterizzat minn tensjoni, jekk mhux ukoll minn antagoniżmu. Matul id-diversi interventi waqt il-konferenza ta' dalgħodu smajna dwar kif l-awturi tal-imgħoddi u wkoll dawk kontemporanji ħolqu xogħlijiet letterarji fejn esprimew diversi sentimenti u materji politiċi. Uħud tkellmu dwar il-ħolma tal-utopja, jew il-falliment tad-distopja. Oħrajn kixfu t-tnawwir ta' tmexxija awtoritarja, inkella esponew dawk iċ-ċirkostanzi fejn l-affarijiet - inkluż il-liġijiet - isiru għat-taparsi għax tmur tfittex u ma ssib xejn minn dak li hemm mistqarr fid-dokumenti.