L-lnkejja ta' Cioran u n-niggieża tal-mikrofinzjoni

Abstract

Il-mikrofinzjoni, jew il-finzjoni flexx [flash fiction], tinvolvi stejjer qosra, ħafna drabi t'inqas minn 750 kelma, inqas minn 500 kelma jew saħansitra inqas minn 100 kelma. Bosta artikli jillatikaw fuq kemm hu l-limitu tal-kliem ta' dawn l-istejjer meta mqabbla ma' stejjer qosra tradizzjonali, u jekk 'mikrofinzjoni' u 'finzjoni flexx' humiex termini sostitwibbli (eż. Nelles). Għal dax-xogħol, nimxi wara Botha u nuża l-kelma 'mikrofinzjoni' bħala terminu ġenerali għall-istejjer qosra qosra ta' kull tip. Il-mikrofinzjoni donnha l-lumpenproletarjat ta l-letteratura, taħlita ta' ġeneri differenti, u dinja li trid tingaġġa magħha biex tifhimha. Filwaqt li l-mikrofinzjoni tiġbed lejn l-għaġla, l-effiċjenza, id-daqqa u l-kompressjoni, il-kitba akkademika dwarha - speċjalment dik fit-tul - hija ħafna drabi kemxejn pedantika. B'hekk, din il-kitba mhix dwar il-mikrofinzjoni. L-għan tiegħi hu li nħabbat l-ideat splussivi ta' Cioran fuq ir-rumanz mal-esperjenza tal-mikrofinzjoni kontemporanja, sabiex nartikola tip ta' niggieża li toħroġ minn dan l-iskontru. Dan iwassalni sabiex ninnota sensiela ta' fetħiet sbieħ li flimkien isawru immaġinarju frisk fejn l-aġenzija tal-kittieb tieħu xejra dinamika u sintetika (fis-sens li tgħaqqad dinjiet differenti). Se nibda billi nippreżenta x-xogħol ta' Emil Cioran, inkompli billi nintroduċi l-mikrofinzjoni, u mbagħad indur lejn sitt fetħiet li joħorġu meta tħabbat lil Cioran u l-mikrofinzjoni flimkien.