Préface [La traduction professionnelle aux multiples visages : français-maltais]

Abstract

Hija waħda mill-karatteristiċi ewlenin tal-lingwi umani li kollha jistgħu jinqalbu f'xulxin. Biex sistema ta' ħsejjes jew sinjali titqies lingwa umana, neċessarjament trid tkun traduċibbli f'lingwi oħra. Dan għaliex il-kategoriji tal-ħsieb li jużaw il-bnedmin, għallinqas fil-ħajja ta' kuljum, huma kullimkien u għal kulħadd l-istess. L-iktar kontribut ta' Noam Chomsky f' dan ir-rigward kien li juri li, minkejja d-differenzi ovvji ta' bejniethom, il-lingwi kollhajixtiebhu f'ċerti aspetti bażiċi. Li kieku ma kenux dawn il-karatteristiċi universali, ma konniex nistgħu niftiehmu ma' nies li jitkellmu lingwa li ma nafuhiex -sitwazzjoni li nibqgħu fiha sakemm ma nagħmlux l-isforz biex nitgħallmuha. Il-karatteristiċi bażiċi universali jagħmluha possibbli għal min irid jitgħallem lingwa li jitgħallimha. Teoretikament nistgħu nitgħallmu l-lingwi kollha li jeżistu. Fil-prattika ma jkollniex żmien. Imma hemm min jimexxilu jitgħallem sitta jew seba' lingwi u jitkellimhom tajjeb. Huwa ċar li dan jgħodd ukoll għat-traduzzjoni.