Atti ta’ memorja f’ "Kulħadd ħalla isem warajh"

Abstract

F’dan l-artiklu nistħarreġ ir-rappreżentazzjonijiet tal-memorja b’rabta mal-identità fil-ġabra ta’ novelli Kulħadd Ħalla Isem Warajh ta’ Clare Azzopardi. Nanalizza x’jissuġġerixxu dawn l-istejjer fuq in-natura tal-memorja, ma’ liema memorja jiddjalogaw, u x’tip ta’ memorja jsawru. Nargumenta li b’tekniki differenti bħall-intertestwalità u n-narrazzjoni inaffidabbli dawn in-novelli jitbiegħdu min-nostalġija li tidealizza l-imgħoddi u jersqu lejn memorja iżjed dinamika u produttiva li tħares lejn il-passat b’sens kritiku u toħolqu mill-ġdid bi gradi differenti ta’ stħajjil. Fit-totalità tagħha din il-ġabra tindirizza dak li, fil-konfront tal-identità u l-memorja personali, jitwarrab jew jibqa’ eskluż mill-istorja dokumentata u dak li hu msikket u mrażżan fil-memorja kollettiva u kulturali. Dan tagħmlu billi tqis perspettivi differenti u tleħħen l-istejjer ta’ nisa komuni, u b’hekk isservi ta’ kontramemorja li tifdi l-istejjer li kulturalment ma ngħatawx spazju għax tisfida n-narrattiva eġemonika u l-amnesija kultant imposta.