Il-Konċilju Vatikan l-Ewwel u l-Konċilju Vatikan it-Tieni : ermenewtika ta’ kontinwità

Abstract

Ħafna drabi l-aktar żewġ konċilji riċenti, il-Konċilju Vatikan l-Ewwel u l-Konċilju Vatikan it-Tieni, huma meqjusa bħala kuntrastanti. Forsi saħansitra jista’ jingħad li l-approċċ lejn il-moderniżmu jew il-post moderniżmu min-naħa taż-żewġ konċilji huwa antitetiku għall-aħħar. Qabel ngħaddu għall-analiżi sħiħa tal-Konċilju Vatikan l-Ewwel u l-Konċilju Vatikan it-Tieni, nixtiequ nisiltu riflessjoni permezz ta’ żewġ epiċi letterarji. Dawn huma Moby Dick ta’ Herman Melville u One Hundred Years of Solitude ta’ Gabriel Garcia Marquez. Dawn iż-żewġ narrativi, kompletament differenti fl-istil letterarju (fejn, madankollu, stil jibni fuq l-ieħor fejn naraw li tal-ewwel huwa mibni minn kumplessità narrativa mimlija simboliżmu u allegoriji, filwaqt li t-tieni rumanz jagħmel użu minn realiżmu maġiku esplorat b’mod ċikliku), jesploraw mistoqsijiet eżistenzjali. Huwa f’dan l-ambitu li wieħed għandu jara r-relazzjoni bejn iż-żewġ konċilji. Il-Konċilju Vatikan it-Tieni ma kienx ikun possibbli mingħajr il-Konċilju Vatikan l-Ewwel. Huwa wkoll importantissimu li wieħed jara d-dinamiżmu bejn il-Konċilji u r-realtajiet storiċi u soċjali ta’ madwarhom li ħallew impatt kbir fuq l-istess Konċilji u d-direzzjoni ta’ kull wieħed minnhom.