Analiżi kwantitattiva u soċjolingwistika ta’ ħames gruppi ta’ varjanti fonetiċi-ortografiċi

Abstract

Il-Malti Standard jinkludi fih numru sostanzjali ta’ kliem li għandu iktar minn manjiera waħda ta’ kif tlissnu u tiktbu. Dawn il-forom differenti li jeżistu għall-istess kelma huma magħrufin bħala ‘varjanti fonetiċi-ortografiċi’. F’din it-teżina, ġbart għadd ta’ varjanti fonetiċi-ortografiċi f’ħames kategoriji, u għal kull par ta’ varjanti li inkludejt fir-riċerka, investigajt liema forma tintuża l-iktar fit-taħdit u l-kitba tal-parteċipanti. Barra minn hekk, minn kull varjant, ħriġt żewġ forom morfoloġiċi u stħarriġthom, sabiex b’hekk, ninvestiga jekk il-parteċipanti jkunux konsistenti fl-għażla tagħhom fiż-żewġ binjiet morfoloġiċi. Studjajt ukoll jekk hemmx xi tendenzi fi ħdan il-varjabbli soċjolingwistiċi tal-lokalità nattiva, l-età u llivell edukattiv. Id-data li kelli bżonn għal dan l-istudju ġbartha permezz ta’ żewġ tipi ta’ kwestjonarjiː wieħed li ġie amministrat b’mod orali, u l-ieħor bil-kitba. Iż-żewġ kwestjonarji kienu indirizzati lill-istess parteċipanti, bil-għan li jiġi studjat jekk hemmx konsistenza minnaħa tagħhom, bejn il-kitba u t-taħdit, fl-għażla tal-varjant. Wara li rranġajt xi nuqqasijiet li ħarġu mill-istudju pilota, għamilt ir-riċerka attwali, u mill-informazzjoni li ġbart, iddiskutejt xi tendenzi li nnutajt għal kull grupp ta’ varjanti li stħarriġt. Imbagħad, qabbilt il-frekwenza ta’ kull varjant, fil-kitba, mal-okkorrenzi tal-istess varjanti fl-MLRS. L-inqas varjabbli soċjolingwistiku li deher li influwenza l-preferenza tal-parteċipanti mill-varjanti li stħarriġt, kien dak tal-lokalità, filwaqt li l-iktar wieħed li affettwa kien dak tal-età.