Eku sagru : il-wirt tat-talb orali f’Malta

Abstract

Din it-teżi tesplora t-talb orali f’Malta, ix-xejriet fundamentali li jsawruh u l-karatteristiċi distintivi u poetiċi li jagħmluh uniku fil-kuntest Malti. Tistħarreġ kif it-talb jiġi trażmess oralment minn ġenerazzjoni għal oħra u kif xi drabi hija l-kitba li tqanqal il-verżjoni orali. Apparti minn hekk, tanalizza xi xejriet lingwistiċi u stilistiċi, bħall-użu tar-repetizzjoni u r-ritmu, li jżidu mal-mużikalità tat-talb. Tanalizza l-metafora li tikkonkretizza xbihat astratti u tagħmel it-talb aktar familjari billi tintensifika l-emozzjoni. Dan l-istudju jiddiskuti xi tipi differenti ta’ varjanti li jistgħu jmorru lil hinn mill-kitba u mill-fomm biss. Jippreżenta kif xi drabi, it-talb tradizzjonali tingħatalu xeħta spontanja biex jaqdi x-xewqa partikolari tal-wemmiena. Jesplora t-talb tematiku relatat mal-figuri divini u kif ħafna minnu huwa assoċjat ma’ emozzjoni partikolari bl-użu tal-metafora kunċettwali. Din ir-riċerka tenfasizza kif dawn l-elementi ma jikkontribwixxux biss għad-dimensjoni reliġjuża, iżda huma xhieda tal-kultura u l-identità Maltija li baqgħu jevolvu u jaddattaw id f’id mal-wirt orali.