It-tempju u l-figura ta’ Ġesù fl-evanġelju skont San Ġwann

Abstract

L-Evanġelju skont San Ġwann jippreżentalna lil Ġesù bħala t-Tempju l-ġdid ta’ Alla, tema Kristoloġika programmatika li nsibuha mferrxa man-narrattiva ta’ dan l-Evanġelju. Qed nitkellmu minn aspett tal-Kristoloġija li mhuwiex nieqes mill-kumplament tat-Testment il-Ġdid, għalkemm l-Evanġelju skont San Ġwann joffri żvilupp aktar sistematiku ta’ din it-tema. Dan jagħmlu permezz ta’ serje ta’ allużjonijiet testwali li nsibu f ’numru ta’ rakkonti fejn il-Logos inkarnat huwa muri bħala “il-post” privileġġjat għal-laqgħa bejn Alla u l-poplu tiegħu. F’dan l-istudju sejrin inħarsu lejn din it-tema li tgħinna nifhmu aktar il-mod kif ir-Raba’ Evanġelista fehem il-persuna ta’ Ġesù f ’rabta mat-Tempju. Dan sejrin nagħmluh billi se nikkonċentraw fuq l-episodju ta’ meta Ġesù daħal fit-Tempju u hemmhekk sab numru ta’ bejjiegħa, filwaqt li sfida lil dawk preżenti biex iħottu t-Tempju u jwegħedhom li jibnih fi tlitt ijiem.