It-titlu ta' "Bin il-bniedem" fl-Evanġelju skont San Ġwann

Abstract

“Bin il-bniedem” (bil-Grieg: ho huios tou anthropou) huwa titlu li Ġesù japplika għalih innifsu fil-paġni tal-Evanġelju. Għalkemm dan it-titlu Kristoloġiku jissemma fl-Evanġelji kollha, hemm differenza fil-mod bejn kif l-Evanġelista San Ġwann u l-Evanġelji Sinottiċi fehmu u użaw dan it-titlu, li l-isfond tiegħu huwa dak li naqraw fil-kapitlu 7 tal-Ktieb ta’ Danjel. L-Evanġelji Sinottiċi jorbtu l-materjal li jitratta l-attività ta’ Bin il-bniedem fuq din l-art mal-miġja tiegħu fil-futur bħala mħallef. Għalkemm l-Evanġelista San Ġwann jurina li kien jaf b’dan u b’xi mod żamm traċċa tiegħu, il-materjal dwar dan it-titlu Kristoloġiku f’dan Evanġelju jiġbor flimkien bosta ideat li jservu sabiex ikomplu joħroġu stampa unika tal-persuna ta’ Ġesù. F’dan l-istudju sejrin inħarsu lejn il-mod kif l-Evanġelista San Ġwann jitratta t-titlu ta’ “Bin il-bniedem” u x’tifsira għandu dan it-titlu bħala parti mill-Kristoloġija ta’ dan l-Evanġelju. [silta]