Ir-rumanzi dwar is-snin tmenin minn lenti kontemporanja

Abstract

Dan l-artiklu jittratta n-narrattiva storika kontemporanja, bl-isfond storiku tas-snin tmenin li huwa fundamentali għan-nisġa tar-rumanzi Castillo ta’ Clare Azzopardi, Is-Sriep Reġgħu Saru Velenużi ta’ Alex Vella Gera u X’Seta’ Ġralu lil Kevin Cacciattolo? ta’ Mark Vella. Il-punt tat-tluq għall-istudju kien itteżi ta’ Emanuel Psaila, Is-Snin Tmenin u l-Prożaturi Maltin (2009), li stħarrġet dawn is-snin fil-kuntest tan-narrattiva li nkitbet fiż-żmien attwali minn Oliver Friggieri u Trevor Żahra, u tat ħarsa lejn xi kittieba postdisgħin. Ir-rumanzi storiċi kontemporanji wessgħu d-dimensjoni tal-ħarsa tagħhom minħabba d-dinamika ġdida tas-soċjetà u l-pajjiż. L-analiżi tar-riċerka tiegħi nbniet fuq it-teorija proposta minn Benedict Anderson fil-ktieb Imagined Communities, li n-“nazzjon” huwa komunità immaġinarja. Din l-asserzjoni kellha tiġi modifikata għat-tliet rumanzi studjati minħabba li fir-realtà Maltija, partikolarment fis-snin tmenin, il-kunċett ta’ nazzjon huwa mħallat mal-identifikazzjoni tal-partit, bir-riżultat li l-azzjonijiet tal-karattri huma kkaratterizzati mill-partiġjaniżmu politiku u l-vjolenza politika. Għaldaqstant, dawn il-karattri jixhdu li l-individwi, għalkemm kienu Maltin, aktarx kienu jħossu sens ta’ affinità mal-partit aktar milli man-nazzjon. Fuq kollox, l-artiklu jagħti ħarsa ħafifa lejn aspetti oħra bħall-memorja kollettiva.