Minn rumanz għal film : il-fedeltà fl-adattament

Abstract

Fil-qofol tagħha l-fedeltà tirreferi għal kemm l-adattament għandu jibqa’ viċin is-sors oriġinali b’relazzjoni mal-plott, il-karattri, it-temi u l-burdata ġenerali. Awtomatikament, id-diskors dwar il-fedeltà kemm-il darba jintrabat mal-ideat tal-lealtà u r-responsabbiltà li għandhom l-adattaturi lejn l-awturi tax-xogħol oriġinali u lejn l-ammiraturi ta’ dan l-istess xogħol. Fl-isfera tal-adattamenti, l-aspettattivi tas-segwaċi spiss jieħdu preċedent minħabba numru ta’ raġunijiet, fosthom il-qligħ li l-adattaturi jixtiequ jagħmlu u l-popolarità li jixtiequ jiksbu. Filwaqt li wħud jargumentaw li grad għoli ta’ fedeltà huwa essenzjali biex tiġi ppreservata l-integrità tax-xogħol oriġinali, oħrajn jemmnu li l-adattament jeħtieġ trasformazzjoni.