L-isfidi biex nippromwovu l-paċi f’sitwazzjoni ta’ kunflitti vjolenti

Abstract

Qed ngħixu f’sitwazzjoni fejn il-vjolenza u l-kunflitti qed jinbtu ma’ kullimkien fuq diversi livelli u għal raġunijiet varji, mhux biss bejn Stati, popli, jew alleanzi internazzjonali u militari differenti, iżda wkoll fit-triq, bejn familji, ġirien, partiti u gruppi oħra. F’dawn il-paragrafi se naqsam magħkom xi riflessjonijiet tiegħi dwar dan is-suġġett, u se niffoka primarjament – u mhux biss – fuq il-kunflitti tipiċi li jinqalgħu bejn il-popli. Se nipprova nwieġeb għal dawn il-mistoqsijiet: X’jistgħu jkunu l-kawżi tal-vjolenzi, kunflitti u antipatiji bejn il-popli? X’nistgħu nagħmlu biex nippromwovu l-paċi u l-ġustizzja f’sitwazzjonijiet ta’ tensjoni? Jeħtieġ nagħrfu li kull kunflitt għandu l-istorja tiegħu u għalhekk għandu jiġi kkunsidrat għalih. Huwa diffiċli ħafna li wieħed jifhem il-kumplessità tar-raġunijiet li jwasslu għal vjolenzi u ġlied armat. Għaldaqstant se nispjega fil-qosor ħafna it-tema tan-narrativi li l-mexxejja politiċi jiżviluppaw biex jispjegaw ir-raġunijiet ewlenin għaliex jinsabu f’kunflitt ma’ poplu jew popli oħra. Barra minn hekk, se nipproponi xi għodod li toffrilna l-Knisja Kattolika biex nimxu fit-triq li tiggarantixxi l-ġustizzja, l-iżvilupp sħiħ tal-bniedem u l-ġid komuni, li huma meħtieġa sabiex tinbena l-paċi vera.