Il-pajsaġġ lingwistiku fl-Università ta’ Malta u t-taħriġ tal-għalliema

Abstract

L-għan ewlieni ta’ din it-teżi huwa li nagħti stampa kwantitattiva u kwalitattiva talpasjaġġ lingwistiku tal-kampus tal-Università ta’ Malta (UM) fl-Imsida. Bis-saħħa tal-analiżi nislet suġġerimenti kif l-UM, permezz tal-pajsaġġ lingwistiku tagħha, tista’ toffri mudell edukattiv aħjar għall-istudenti-għalliema sabiex ikunu ppreparati għall-multilingwiżmu u lmultikulturaliżmu meta jibdew jgħallmu. In-numru tal-permess li ngħatajt sabiex inwettaq din it-teżi huwa EDUC-2024-00333. Id-dejta tikkonsisti minn ritratti ta’ 2957 tabella madwar il-kampus, li l-ewwel nanalizzahom skont it-tip ta’ tabelli, il-lingwi li huma miktubin bihom, u jekk humiex sinjali uffiċjali (top-down), sinjali mhumiex uffiċjali (bottom-up) jew sinjali b’valur miżjud (value-added), u mbagħad nanalizzahom skont il-materjali tagħhom u l-kuluri użati. Imbagħad, inqabbel ir-rizultati li ħarġu mill-analiżi ma’ dak li hemm miktub fil-politika lingwistika u l-pjan strateġiku tal-UM. Sabiex nuri l-importanza edukattiva tal-pajsaġġ lingwistiku, niddiskuti l-effetti tiegħu fuq kemm l-istudenti-għalliema kif ukoll fuqi bħala studenta partikolari, li jistgħu jkunu konjittivi u emozzjonali. L-ispazji vojta nikkunsidrahom ukoll, u għalhekk, nagħti xi suġġerimenti dwar kif dawn jistgħu jimtlew.