“dirgħajk rotob dejjem wennsuni” : l-esperjenza materna skont poetessi Maltin

Abstract

Lokalment, sa ftit taż-żmien ilu, fil-letteratura konna naraw lill-mara kif ukoll ’il-omm bħala karattru miktub mir-Raġel. Il-kitbiet b’xeħta patrijarkali ma jiqfux biss mal-fantasiji romantiċi u sesswali maskili iżda jfittxu li jirreġistraw ukoll l-esperjenzi femminili u materni ta’ mara. Ħafna drabi, iżda, din il-kitba twassal biex jitneħħa t-tiġrib kollu mentali, emozzjonali u fiżiku tal-omm. Għalhekk, dawn in-narrazzjonijiet tal-esperjenzi tal-mara u l-omm, mgħoddija mill-pinna maskili, mhumiex veritieri. F’dan l-artiklu se nagħti ħarsa lejn il-Femministi tat-Tieni u t-Tielet mewġa, u kif għenu biex in-nisa jieħdu lura l-kitba dwar il-mara u jagħmluha tagħhom bit-tajjeb u l-ħażin kollu tal-esperjenza femminili. L-osservazzjonijiet tiegħi joħorġu mill-qari ta’ tliet poetessi Maltin, Simone Galea, Nadia Mifsud u Claudia Gauci, li jiktbu l-esperjenza tagħhom kemm bħala nisa u bħala ommijiet.