Daħla [Il-Malti f’politika lingwistika nazzjonali]

Abstract

Dawn li għandkom f’idejkom huma l-atti tar-raba’ konferenza fi ħdan is-sensiela Lingua-Politik li ttellgħet b’suċċess bejn l-2022 u l-2025 b’kordinament bejn id-Dipartiment tal-Istudji Politiċi u l-Governanza u d-Dipartiment tal-Malti fi ħdan l-Università ta’ Malta. Din l-avventura konġunta, biex neżaminaw ir-rabta bejn id-dinja tal-politika u l-qawwa tal-letteratura u l-lingwa, bdejnieha fit-30 t’April 2022 meta fil-Parlament ta’ Malta organizzajna l-ewwel konferenza bit-tema ‘Il-Poter tal-Kelma: Politika u Letteratura f’Oliver Friggieri’. Sena wara, eżattament fit-22 t’April 2023, erġajna għaqqadna l-forzi tagħna biex stħarriġna r-retorika politika; is-saħħa li għandha l-kelma biex tħeġġeġ lin-nies u toffri viżjoni, inkella biex timmanipula u tiddottrina. It-tielet appuntament wasal fis-27 t’April 2024 meta għadd ta’ esperti interpretaw id-diversi ħsus politiċi li joħorġu minn xogħlijiet letterarji Maltin u internazzjonali waqt konferenza pubblika bit-tema, ‘In-Niggieża tal-Kelma: il-Proża Politika’.