Kif u għaliex Marija ta’ Magdala ġiet marbuta mal-mara midinba

Abstract

Għal sekli sħaħ, l-Insara fil-Punent qiesu lil Marija ta’ Magdala bħala l-prostituta niedma li ħaslet riġlejn Ġesù bid-dmugħha u xxutatthomlu b’xagħarha, filwaqt li dilkithomlu bi fwieħa li kienet tiswa ħafna flus. Din ix-xbieha ispirat tant pitturi, omeliji u xogħlijiet oħra ta’ letteratura, b’mod li Marija ta’ Magdala saret waħda mill-personaġġi l-aktar maħbuba fit-Tradizzjoni Nisranija. Minkejja dan, meta naqraw b’attenzjoni l-Evanġelju, nibqgħu sorpriżi hekk kif niskopru li l-ebda wieħed mill-erba’ Evanġelisti ma jsejjaħ b’mod espliċitu lil Marija ta’ Magdala bħala prostituta, kif lanqas ma jgħidulna li Marija ta’ Magdala kienet il-mara midinba bla isem li tissemma fl-Evanġelju skont San Luqa. Il-mistoqsija mela tibqa’ kif saret din l-identifikazzjoni u għaliex mal-medda taż-żmien l-Insara bdew iqisu lil dawn iż-żewġ nisa bħala l-istess mara. F’dan l-istudju sejrin nesploraw din il-mistoqsija affaxxinanti permezz ta’ analiżi tat-test bibliku, filwaqt li nfakkru l-Knisja x’qed tgħid illum dwar dan kollu.