L-istatwa tal-ġebel ta’ San Sebastjan f’Ħal Qormi : minn idejn l-iskultur Francesco Fabri… u Gerolamo?

Abstract

Fl-ewwel deċennji tas-seklu dsatax, taħt il-ħakma kolonjali Ingliża, Ħal Qormi esperjenza qawmien ġdid fil-qima ta’ San Sebastjan meta f’Mejju 1813, l-abitanti ffaċċjaw l-aktar epidemija bubonika vili fl-istorja tal-belt Pinto. F’medda ta’ ħdax-il xahar - bejn Mejju u Marzu 1814 - f’Ħal Qormi, ’il fuq minn 723 abitant, minn popolazzjoni ta’ madwar 4,500, ċedew għall-marda. It-telf kien jammonta għal 16% tal-popolazzjoni ta’ Ħal Qormi ta’ dak iż-żmien; figura allarmanti tassew li tikxef is-sofferenza enormi li għaddiet minnha l-komunità speċjalment meta nqisu li l-imwiet kollha fil-gżejjer Maltin matul din il-pandemija kienu ta’ madwar 4,600 ruħ. Din il-ġrajja traġika qanqlet għal darba oħra d-devozzjoni lejn il-qaddis u fl-1816 ittellgħet statwa tal-ġebel, tradizzjonalment skolpita fil-franka Maltija minn Francesco u Gerolamo Fabri mill-Birgu, li tirrappreżenta l-martirju ta’ San Sebastjan, bħala ex-voto ta’ dan l-avveniment traġiku li ħalla marka fuq it-tessut tal identità kollettiva tal-Qriema. [silta]