L-individwalità tal-vucijiet f’Kulhadd halla isem warajh ta’ Clare Azzopardi

Abstract

Din it-teżi dwar it-tieni antoloġija ta’ novelli ta’ Clare Azzopardi, Kulħadd Ħalla Isem Warajh (2014), tiffoka fuq il-vuċi narrattiva, għaliex fl-istejjer ta’ Azzopardi lvuċijiet huma kumplessi u għandhom funzjoni ċentrali. Huma l-mod ta’ kif Azzopardi ssawwar l-istorja tagħha, għax il-vuċijiet u n-nisġa tal-istorja huma elementi fundamentali f’xogħol organiku wieħed. Fid-daħla għall-ewwel antoloġija ta’ novelli, Il-Linja l-Ħadra tal-2006, Adrian Grima jagħti importanza lill-ilħna differenti u jgħid li “Clare Azzopardi dejjem tagħtina vuċijiet u perspettivi differenti, u sikwit il - kumplessità tan-nisġiet tagħha tiddiżorjentana jew proprju tistordina, bħalma jistorduna l-ilħna differenti li jtambru ġo fina f’kull esperjenza importanti għalina”. Azzopardi tagħmel l-istess f’din l-antoloġija, anzi nemmen li fit-tieni antoloġija Azzopardi tagħti importanza akbar lill-vuċijiet individwali ta’ dawn in-nisa, milli nnisġa tal-istorja, u għaliex wieħed mill-għanjiet ta’ din l-antoloġija kien li tagħti vuċi lil dawk in-nisa li qatt ma nisimgħu bihom.